Sjálfbærniskýrsla Garra 2023

Vegferð okkar í sjálfbærni og frumkvæði til meiri árangurs á þeim vettvangi má rekja aftur til ársins 2015 þegar hafist var handa við að safna skipulega upplýsingum um úrgang og undirbúa flutning í Hádegismóa. Húsnæði Garra var byggt og hannað til að valda lágmarks umhverfisáhrifum, vélar og tæki Garra nýta sér orkusparandi lausnir sem hafa gert okkur kleift að reka mun stærra húsnæði og tækjabúnað á hlutfallslega umhverfisvænni hátt. Í vöruhúsinu eru fullkomnir kæli- og frystiklefar þar sem kolsýra er nýtt í stað umhverfisspillandi efna eins og freons og ammoníaks. Orkusparandi LED lýsing er í húsnæði Garra og snjallmælar fyrir rafmagnsnotkun. Losunarkræfni á hvern rúmmetra heldur því áfram að dragast saman sem og losunarkræfni orku og losunarkræfni starfsmanna.

Garri notar umhverfishugbúnaðinn Klappir EnviroMaster til að safna umhverfisgögnum. Hugbúnaðurinn safnar gögnum um flokkun, endurnýtingu úrgangs, notkun á eldsneyti, heitu og köldu vatni og rafmagni.

Árið 2023 var viðburðarríkt ár í rekstri Garra, við fögnuðum 50 ára afmæli og unnið var að aukinni skilvirkni í vöruhúsi. Frystir var stækkaður og nýr kælir var tekinn í notkun ásamt sjálfvirkum tínsluturni og nýjum ferlum sem hafa aukið skilvirkni í vöruhúsi og dreifingu. Starfsfólk Garra tók virkan þátt í greiningu og vali á sjálfbærniáherslum, sem eru ábyrg starfsemi, mannauður, aðfangakeðja og viðskiptavinir. Með þátttöku starfsmanna var grunnur að sjálfbærnimenningu lagður og stefna og markmið fyrir árið 2023 voru kynnt á 50 ára afmæli Garra.

Með samhentu átaki starfsmanna tókst vel til árið 2023 með flokkun og endurnýtingu úrgangs. Rétt tæp 80% úrgangs var flokkaður hjá Garra og um 98% úrgangs var endurunninn eða endurnýttur.

Bifreiðum sem ganga einungis fyrir jarðefnaeldsneyti fækkaði á milli ára og voru einungis fimm slíkir í rekstri Garra í árslok 2023 og er því hlutfall rafmagnsbíla og plugin/hybrid bíla af heildarbílaflota 76%. Við stefnum enn ótrauð á markmið um 95-100% hlutfall rafbíla og plugin/hybrid bíla árið 2026.

Verulegur árangur náðist við að minnka losun vegna umfangs 1 (bein losun vegna eldsneytisnotkunar vegna reksturs bifreiða). Losun minnkaði um 56% frá 2022, þ.e. úr 62,76 tCO₂í niður í 35,48 tCO₂í á síðasta ári. Þetta kemur fyrst og fremst til af rekstri mun færri bifreiða sem ganga eingöngu fyrir jarðefnaeldsneyti.

Losun vegna umfangs 2 jókst á milli áranna 2022 og 2023. Var 27,91 tCO₂ árið 2023 en 21,48 tCO₂í árið 2022. Miklar framkvæmdir stóðu yfir í vöruhúsinu, meðal annars veruleg stækkun frystis og bygging nýs kælis, en báðar þessar einingar þurfa aukið rafmagn til að viðhalda réttu hitastigi og tryggja loftræstingu.

Starfsánægja var mæld í tveimur árlegum könnunum á árinu og helst áfram góð. Í viðhorfskönnun VR „fyrirtæki ársins“ mældist þátturinn „ánægja og stolt“ með einkunnina 4,42 af 5 mögulegum og í annarri könnun á vegum Garra mældist voru svör við spurningunni: „Á heildina litið er ég ánægð(ur) í starfi mínu“ með einkunnina 4,3 af 5 mögulegum.

Á árinu 2023 var mannauðsstefna Garra endurskoðuð og um leið mörkuð skýr stefna í fræðslumálum. Virðing, vöxtur og vellíðan eru leiðarljós Garra þegar kemur að mannauðsmálum og það felur í sér að mikil áhersla er lögð á gæða þjálfun og símenntun. Fræðslugreining fyrir allar deildir var framkvæmd og fræðsluáætlun skilgreind fyrir árið 2023.

Töluverð vinna var lögð í að fínpússa verkfæri jafnlaunavottunar og fylgja aðferðum hennar vel eftir. Viðhaldsvottunarúttekt á vegum BSI fór fram í maí og var hún án athugasemda.

Engin alvarleg óhöpp áttu sér stað á árinu 2023 en nokkur minniháttar og næstum-því-slys. Haldin var öryggisvika haustið 2023 sem tókst vel til. Öryggisvikan hafði þann tilgang að auka þekkingu starfsmanna á öryggismálum og auka meðvitund um mögulegar hættur í umhverfinu.

Því miður náðist ekki að safna upplýsingum frá birgjum Garra um áherslur þeirra í sjálfbærni, né að framkvæma nýtt kerfisbundið áhættumat á öllum birgjum okkar meðal annars út frá sjálfbærniáherslum. Stefnt er eindregið á að ljúka þessu verkefni árið 2024.

Árleg þjónustukönnun Garra var framkvæmd á vormánuðum og erum við ánægð með heildaránægju viðskiptavina okkar og það traust sem okkur er sýnt. Við höldum áfram á þeirri vegferð og ætlum okkur að gera enn betur á árinu 2024.

Frá upphafi hefur Garri leitast eftir því að styðja við fagfólk í matreiðslu eftir bestu getu og því styður Garri við Hótel- og Matvælaskólann, Klúbb Matreiðslumeistara og Bocuse d´Or. Að auki býður Garri árlega fagfólki í matreiðslu á kynningar og námskeið til innblásturs og þróunar. Garri stendur fyrir fagkeppnunum Eftirréttur ársins og Konfektmoli ársins, og veitir jafnframt sérstök hvatningarverðlaun nema.

Garri styrkir jafnframt ýmis íþróttafélög og góðgerðasamtök ár hvert.

Framundan eru mikilvæg verkefni sem við hjá Garra ætlum að vinna að með markvissum hætti. Við ætlum okkur að leggja okkar að mörkum að draga úr hlýnun jarðar og ná árangri í sjálfbærni og höfum núþegar unnið að metnaðarfullum og skýrum markmiðum fyrir árið 2024.